政壇：新政總超豪會議室丟空
據聞新政府總部有個細啲嘅會議室，係打算開記者會時用嘅，裏面有晒最先進嘅儀器，可以畀電台、電視台嘅記者同攝影師使用。呢個會議室入面仲有可以展示多個唔同畫面嘅大螢幕，班高官開會時有冇分心、瞌眼瞓都一目了然。
但原來呢個細會議室又係夕陽政府嘅大白象工程之一，皆因個會議室到依家都丟空冇人理。話說煲呔曾原本打算發表最後一份施政報告時，用呢個會議室開記者會，但有人話佢聽，如果喺嗰度開記者會，啲攝影機就會影到佢身後嘅大螢幕，視覺上唔係咁靚仔咁話。結果佢最後都係用番大啲嗰個會議室開記者會。
我哋都問過政府中人，證實真係有個會議室係開記者會用，但依家仲整緊未用得。
