政壇：搞搞政：林鄭被寸嘥錢亂保育

由景賢里、何東花園，到近日終於被評級的舊政府總部西翼，引起大眾對保育嘅關注。唔知係咪見大家講得興起，財爺鬍鬚曾亦跟風，尋日喺佢個網誌講保育，仲好似暗寸發展局局長林鄭月娥咁。

鬍鬚曾話月初去法國康城，以中國代表團身份出席二十國集團高峰會，喺巴黎發現咗一條火車軌保養得好好，仲有感而發咁話，其實歐美唔少已棄用嘅鐵路都活化得好好，但要數到最吸引佢嘅，都係紐約一個公私營合作嘅保育項目High Line Park。

佢話呢個公園非常有特色，好巧妙咁將一條原本高架嘅路軌轉化做一個空中公園長廊，整個工程只係用咗五千萬美元，即係四億港元都唔使，但價值遠超政府投資，值得參考；又話有創意嘅保育唔使花好多錢，社會經濟效益好大。

前排林鄭搞何東花園保育，外界一度話政府分分鐘要賠成二十億，但當林鄭搞保育搞到一頭煙時，鬍鬚曾冇幫手之餘，仲喺度贈興，係咪想插林鄭保育冇創意兼嘥錢呀？