除夕煙火幾爛尾 皆因官僚吊吊揈

煙花璀璨奪目，可惜稍縱即逝，正如有人話齋，一剎那光輝唔代表永恒。不過咁，有一剎那光輝都好過冇吖，一年一度嘅中環國金中心除夕煙火倒數匯演，今年幾乎爛尾，港人連一剎那光輝都爭啲睇唔到添吖。

呢項盛事連續舉辦咗四年，過往一直由兩大地產商贊助，但對方今年打退堂鼓，上個月通知旅發局唔再贊助相關費用，只提供舉辦倒數活動嘅場地。旅發局臨急臨忙搵唔到新贊助商，惟有向政府求救，四百萬元活動經費由庫房埋單，納稅人被迫硬啃。

本來呢，國金中心煙火倒數既係市民歡度除夕嘅節目，亦係吸引遊客嘅生招牌，使少少錢係值得嘅。講真，呢筆錢用嚟放煙花總好過畀班官亂咁揈。弊在港府懶懶閒，唔嗲唔吊，以為地產商老奉贊助，結果搞到幾乎爛尾，真係狼狽。

其實，當局同地產商簽嘅贊助協議只為期三年，對方額外贊助第四年煙火倒數之後即刻打退堂鼓。講到尾，在商言商，人哋都要考慮成本效益(o架)，總唔能夠永遠捱義氣啩。如果當局係負責任嘅，就應該提早做嘢，喺協議到期前同對方傾，而唔係大安旨意，以為對方一定支持。家陣傾唔掂數至硬啃，你話幾鬼難睇吖！

話時話，港府冇面都係自己攞嚟衰啫，問題係，今次規劃同溝通亂晒大龍，明年除夕煙火倒數好可能無法喺國金中心舉行，要另覓合適大廈續辦。盛事無緣喺地標式建築舉行，花咗大量人力物力樹立嘅旅遊業生招牌，港府變相自己拆番，直頭係貽笑大方，叮！

講開又講，港府闊佬懶理做甩手掌櫃，發展旅遊業齋噏唔做嘢，都唔係第一次咯。好似尖沙咀星光大道咁，旅遊手冊、宣傳廣告吹到天花龍鳳，實情係部門之間各自為政，令到呢個著名景點淪為三不管地帶，非法流動小販不斷滋擾遊客，搞到烏煙瘴氣。早排美國有線電視新聞網絡旗下網站將星光大道評為全球十二大「最浪得虛名景點」之一，影衰晒香港。

講到呢度，太一叮諗起周杰倫唱嘅「煙花易冷，人事易分，而妳在問我是否還認真」。對愛情玩玩吓一定掟煲收場，港府做事冇誠意，卸得就卸，梗係煙花易冷，人事易分喇，叮！