政壇：海域重組許浩明甩難
海域集團尋日正式通過重組方案，即係呢間公司重生進入直路，而一直「愁困襄陽」協助臨時清盤人嘅Herbert許浩明就真正宣告甩難，可以完全脫離「危險海域」，記者打畀佢，佢劈頭就慨嘆話：「五年幾啦！」
海域喺○七年出事，到○九年中，許浩明三個字先至由海域訴訟嘅被告人名單中刪除，到今日轉眼又兩年幾嘞，Herbert好感慨咁話，對佢嚟講係人生嘅重要里程碑，期間受盡千夫所指喎，但佢話公司管治嘅嘢，發生問題好難避免，最緊要出咗事要肯承擔，搞掂佢為止。
講起啲愛駒，佢又即刻精神番，佢隻「甜蜜至上」呢排狀態唔錯，仲有隻自購新馬「甜情蜜意」會喺十二月首度出賽，佢希望可以標個「尾會」，拉頭馬威番次。
