官富民窮拒開倉 孤寒財爺真無良

財爺曾俊華開始諮詢財政預騙案……唔係，係財政預算案。不過，話鬍鬚曾主理嘅預算案有欺騙成分，都唔錯得去邊囉，事關佢年年大玩狼來了把戲，舊年就創下扭虧為盈相差一千多億元嘅歷史紀錄，成為本港開埠以來最大騙案。

嗱，騙局呢家嘢，篤數固之然係呃人，就算數據冇錯，一樣可以存心不良呃神騙鬼。唔信嘅話，睇吓鬍鬚曾新布嘅通脹天仙局啦，叮！

通脹如狼似虎，但鬍鬚曾前日就大唱反調，話通脹將喺第四季見頂。統計處尋日一齊唱雙簧，指十月通脹按年升百分之五點八，同九月持平。有數有據，通脹見頂，皆大歡喜！

身為普羅大眾，太一叮真係好想瞌埋眼相信鬍鬚曾一次，事關通脹老虎唔係人咁品。但事實再次證明，港府靠得住，豬乸都會上樹。

冇錯，整體通脹率係就係冇升到，但係魔鬼在細節中，煙酒類消費品價格按年升咗近兩成，其他衣食住行價格全部砰砰聲咁升，其中住屋消費更加上升超過百分之八，高過晒平均通脹率。鬍鬚曾玩數字遊戲，報喜不報憂，咁仲唔係呃鬼食豆腐？

其實，基層市民未必識睇冷冰冰嘅經濟數據，但係荷包入面嘅錢愈嚟愈唔見使，一分一毫都心中有數。牛肉啱啱先至宣布加價百分之二至三之嘛，話口未完，又話下年加電費嘞。基層市民百上加斤，再咁落去，通脹見頂就望唔到嘞，被通脹滅頂就差唔多！

即係咁，叫得天仙局，呃人梗係有目的啦，鬍鬚曾做呢場通脹見頂大龍鳳，講穿咗，無非想為明年預算案閂定後門啫。既然通脹都緩和咯，咁就大條道理做守財奴，唔使開倉濟民啦！

不過，太一叮要提醒鬍鬚曾，舊年「史上最廢」預算案搞到天怒人怨，最後都要跪低派錢六千蚊啦。今年通脹節節上升，預算案就算唔再派錢，都好應該推出更多紓困措施。唔好唔記得，香港財政儲備加埋外匯儲備多達二萬幾億，窮人數量居然超過一百萬，貧富懸殊嚴重程度冠絕全球。既然官富民窮，如果咁都唔開倉惠民，實在太無良！

不論鬍鬚曾係有心無力唔識計數，定係有力無心唔肯開倉惠民，都冇資格做父母官。橫豎閣下做過通波仔手術，不如提早卸任返歸休養啦，叮！