政壇：王國安嘆證券業慘過沙士
大市跌多反彈少，金魚缸中人好多都冇啖好食，心情都唔多靚。聽聞，主要由金融界前線員工組成嘅證券及期貨專業總會，今個月二十九號十周年會慶，規模將會大縮水，由前年大排筵席四、五十圍，到今年只擺二十零圍，反映金融業界嚴冬日子已降臨。加上近排陸續有金融機構派大信封，睇嚟今個冬天真係有排捱！
證券及期貨專業總會會長王國安直認近排個市咁差，各人心情麻麻，故今年會慶唔再大規模搞，大家圍埋食餐飯算喇。佢仲呻話經紀依家真係好慘，覺得仲衰過沙士，生意好少，加上又有行家「劈佣」、沽空肆虐，經營環境簡直係雪上加霜。
證券及期貨專業總會會長王國安