政壇：半裸男搶鏡煲呔曾嚇呆

煲呔曾去夏威夷出席亞太經合組織部長級會議（APEC）前，曾經喺社交網站facebook嘅特首辦群組認叻，話自己第九次出席會議，出席率好高喎。不過，煲呔曾出席會議可謂乏善可陳，尋日仲鬧出一單笑料，完全露底表現出自己「處變好驚」同尷尷尬尬個樣，失禮人前。

話說煲呔曾見完美國國務卿希拉妮（Hillary Clinton）後影合照時，忽然有一個赤裸上身、下身淨係圍住一塊布同揸住支火炬嘅男人標出嚟，喺佢哋後面疾走，希拉妮發現半裸男後隨即真情流露，大方拍手大笑，仲同現場攝影記者講笑，話希望佢哋影到個半裸男喎。

相反煲呔曾就好似未瞓醒咁，面容全程繃緊，雙手放喺背後，只係木無表情咁遠眺個半裸男，都唔知佢想望乜。當煲呔曾擰番過嚟，發現全場人都喺度笑緊時，佢依然未瞓醒，好似好無助咁，尷尷尬尬咁微笑一下，搞到希拉妮即刻拍煲呔曾膊頭安撫吓佢。