食飯送曱甴 嚇足一百分

大家樂又有新出品，「小強菜式」賣到街知巷聞，大家真係要(目及)到實。點解？因為呢位小強唔係人咁品，佢有個大家熟悉嘅大名，叫做曱甴，即係咁，大家樂食物送曱甴，有啲係原隻浸湯，有啲仲係新鮮生猛嘅添，包你食完畢生難忘！

大家樂食物送曱甴嘅投訴無日無之，鑊鑊新鮮鑊鑊甘。繼有市民投訴屯門蝴蝶廣場分店食火鍋送生猛曱甴後，同區屯門市廣場分店又被食客投訴，話食完半碗米粉先至發現一隻曱甴屍體浮上湯面，當堂嚇到連隔夜飯都幾乎嘔埋出嚟。

嗱，講到以曱甴佐膳呢條獨步配方，大家樂真係發揚光大o架。舊年奧海城一期分店出過「滑蛋小強雞扒外賣早餐」，今年鴨脷洲利東邨商場分店炮製過「曱甴伴木瓜花生湯」……曱甴菜式推陳出新，變化萬千，真係做足一百分咯！

講開又講，「大渣落，令你嘔足一百分」，真係名不虛傳。令人聞之作嘔嘅何止小強菜式，仲有菜蟲火鍋、煙頭四寶河、金屬條免治牛肉飯、透明膠紙早餐等等，簡直五花八門。最誇張嘅係，有食客用膳期間，居然有隻老鼠從天而降，仲碰及食客手腕添，真係諗起都毛管戙呀！

計太一叮話齋，下次大家樂再以小強奉客，不如送埋大檸樂啦，咁就達到食物同食客心境合二為一嘅最高境界嘞。

講開又講，大家樂唔止衞生環境惡劣，仲漠視法紀添。有食客投訴，天水圍頌富商場大家樂分店容許食客帶狗隻入內進食，食客不滿狗毛亂飛污染食物，向店方投訴，點知職員竟然倒轉嚟叫投訴食客換位坐，簡直離晒大譜。喂，《食物業規例》講明，任何人不得帶狗隻入食肆，大家樂究竟唔識字，定係懶理法例吖？

諗起都好笑，大家樂對食客大方送小強，對員工就斤斤計較。最低工資實施前，年年賺大錢嘅大家樂居然率先扣除員工飯鐘錢，搞到無良僱主臭名遠播，大家樂變「太刻薄」。

咦，咪住先，大家樂衞生惡劣，小強事件不絕於耳，投訴幾乎厚過電話簿，唔通無王管嘅咩？都差唔多囉，因為負責監管嘅食環署敷衍塞責，得過且過，有王管變無王管，所以咪成日加料咯！嗱，咪話太一叮唔提醒，如果食衞局局長周一嶽仲唔做好自己份工，任由食肆製造不潔食物，遲早變成過街老鼠，同小強一齊被人拍扁嘅咋，叮！