政壇：黃家和狙擊張宇人

明年立法會選舉硝煙四起，飲食界方面早已傳出盤據席位十多年嘅自由黨張宇人（Tommy）今年會遇勁敵，事關香港餐飲聯業協會會長黃家和（Simon）有意強勢挑戰，而「張黃之爭」更可能喺下月舉行嘅選委選舉已經上演。據聞，黃家和陣營有意藉選委試票，正醞釀支持友好名單參選選委，間接測試吓自己喺業界嘅人氣同支持度，最快日內成事，呢次掌勺人比併分分鐘引爆飲食界近年最激戰事。

中小企對名單有怨言

特首選舉委員會嘅提名如火如荼，連一向自動當選嘅飲食界選委界別今年都起風雲，業界消息話，飲食界各路英雄一直有商有量，但今次卻似乎有意外，事關Tommy疑似打破多年嘅慣例，失驚無神推出十七人名單，而且多數都係大企業嘅代表，令到業界嘅中小企都有怨言。而且，明年嘅特首選舉好大機會係有競爭嘅選舉，所以唔少業界中人都蠢蠢欲動想一試身手。

據聞，Simon對有業界中人有意披甲上陣都樂觀其成，只要友好名單準備就緒就會表態支持甚至居中協調喎，不過亦有業界中人對Simon有關做法不以為然，反爆料指Simon最近積極搵人幫手，但屢次畀人請食檸檬，相信最後出到名單，都可能同Tommy嘅星光熠熠名單冇得比喎。

Tommy接受查詢時話，自始至終都冇提到Simon個名，仲語帶譏諷咁比喻，如果有人要試水溫，都要嗰個人願意跳落水，否則都唔知啲水得唔得喎。點都好，如果Simon組名單順利，同Tommy一場對撼似乎避無可避。