政壇：廠商會青委足賽騷肌肉

政圈商界都致力培養青年軍，中華廠商聯合會一班青委日趨活躍，尋日佢哋組隊參加該會第二年搞嘅七人足球賽。青委主任梁啟洲（Michael）、成員周紹榮（Joseph）、金百加集團主席黃家和囝囝黃浩鈞（Howard）、工業總會會長孫啟烈細仔孫榮良（Warren）等都有落場大顯身手，雖然最後落敗收場，但大家都好盡興。

平日斯斯文文嘅Joseph，卸下西裝後原來係肌肉男，佢話每日收工後都會落街跑步，又會做掌上壓，唔做會瞓唔着喎。Warren就喺澳洲讀書時已經踢波。Howard更加喺加拿大多倫多讀書時已經踢省隊，唔怪得狀態咁fit，佢家吓大部分時間會留喺上海幫爸爸手管理公司業務，不時仲會抽時間同上海嘅波友踢番兩場波。

尋日氣溫有成三十度，太陽好曬，一班青委成員都揮汗奮戰，最後雖然落敗，但佢哋話志在切磋球技，勝負都冇所謂喎。