政壇：李文斌蜜月難忘罷工

    • 仁濟醫院董事局尋日喺沙田馬場搞「仁濟盃」，包廂房開Party，筵開二十幾圍，主席Edmond李文斌同太太Amanda滿場飛招呼客人，搞到落注都冇時間。

    講起澳航突然停飛封殺工運，Edmond話家族生意同澳洲無往來，未受影響。但回想四年前，佢同太太去巴黎度蜜月曾遇上當地公共交通工具罷工，想搵架巴士搭吓都難，惟有出入搭的士。

    Party上，撞見剛由南非度蜜月返港嘅李文恩同太太十指緊扣，好甜蜜。文恩話南非之行好刺激，近距離觀賞野生動物獵食，大開眼界。佢不忘炮製驚喜，喺大草原上靜雞雞安排一頓燭光晚餐，十足拍戲咁浪漫。

    「Money18免費即秒股票報價網站」現推出8升級功能，財經資訊，實時實發！

    仁濟主席李文斌夫婦（前排左三及四），尋日將「仁濟盃」頒畀得獎嘅馬主陳華新（前排左二）。

    仁濟副主席嚴徐玉珊（左二）同老公嚴玉麟（右二）、囝囝Jacky（右一）同新抱Jeanly（左一）齊撐場。