政壇：邱世傑11.5萬投「唔三唔四」
被指「唔三唔四」，相信冇人受落，但同諧音嘅車牌「5354」就有捧場客。運輸署尋日拍賣二百八十個傳統車牌，吸引咗唔少情侶到場，而曾喺○八年奪得世界傑出華人獎同喺○九年獲頒發鋼琴教育家成就獎嘅邱世傑，偕女友以底價十一萬五千元投得無字頭車牌「5354」，以及二萬二千元投得「XX 1961」。
邱世傑話「5354」諧音係「唔三唔四」，具話題性，值得花錢購入；至於「XX 1961」就因為字母同數字排列富美感，「19」同「61」剛好倒轉，頗為特別。
至於全日最高價嘅車牌係「HK7777」，由一名男士以三十萬元投得；第二高價車牌為無字頭「1878」，就由一名外籍人士以二十三萬五千元投得，其女友人透露呢個牌號碼係公司嘅上市號碼。
