CULTURE噏：老土正時興 80後尋古蹟

○七年保衞皇后碼頭事件，加上本地電影《歲月神偷》於一○年揚威德國柏林影展，令80後更加關注保育問題，他們希望社會在不斷發展的同時，給予舊事物多一點生存空間。長春社文化古蹟資源中心副主席梁炳華認為，青少年關注本地傳統文化，有助他們建立對香港的歸屬感。

這次我們找來研究香港古蹟文化逾十年的80後青年Stanley，分享研究點滴。

Stanley：我對香港古蹟的興趣，係由了解郵政歷史開始。初中時鍾愛集郵，認識了一班志同道合的發燒友，一齊探討香港郵政歷史，搜集郵品，我嘅興趣亦慢慢擴展到香港本土歷史。

梁：喺我哋身邊，有好多好有價值、好獨特嘅古物古蹟，它們比千篇一律嘅商場更加有吸引力，只係我哋留意唔到。而在近年，保育成為熱話，很多年輕人留意古物古蹟，也參加民間團體所舉辦的古蹟及文化遺產活動。

Stanley：近年香港好多舊建築物被清拆，我喺香港土生土長，對香港有特別感情，希望可以做啲嘢，留個記錄，保留香港歷史。好似舊式街牌咁，以前嘅街牌係釘喺牆上，但因為建築物被重建、改建，街牌被拆咗或被遮擋。所以喺十年前開始，我就同幾位朋友走遍港、九、新界及離島，找到一百七十塊舊街牌，做咗詳細記錄。

梁：香港本土歷史，係社會靈魂，如果年輕人可以認識到更多本土歷史，可增加對社會嘅歸屬感，對建立本土感情好有幫助。

Stanley：現時有關香港古蹟嘅資料好少，部分亦不完整，如只有一幅圖或一段文字，我們便靠這些資料，再去搜尋相關的古蹟文物，呢個過程好似尋寶，有一定難度，好似之前睇到《香港文物誌》，有一段文字介紹長洲十五塊界石同一幅地圖，我哋就憑住咁少資料，去咗長洲二十幾次，終於搵到十塊，有啲仲喺亂葬崗側邊添！能夠保留呢啲歷史資料，真係好開心、好有滿足感。

另外，喺上年年尾，除咗長洲，香港還有八條村舉行太平清醮，部分更是十年一度，係難得盛事。為了親身見證每個太平清醮，我辭咗份工，用咗一個月時間，去記錄呢個傳統節慶活動。此外，我哋會定期舉辦活動，令更多參與人士認識到香港舊歷史、古蹟同文化。

梁：科技進步，相機、攝影器材嘅普及，年輕人可藉此為傳統事物作記錄，與同好分享，可增加他們的滿足感，樂意繼續參與古蹟保育，成為本港保育的生力軍。