政壇：邱騰華賴通識唔掂

環保人人都識講，但真正有幾多人懂得保護環境就好難講，尋日環境局局長邱騰華同三百個學生講環保，佢預備咗幾條問題，可惜啲學生連香港人均碳排放量係幾多都答唔出，邱騰華整啲山埃貼士誤導佢哋，結果都係錯完又錯，搞到邱騰華都要感慨係咪通識太難教！佢呢招真係有推波之嫌，事關推動環保教育係環境局局長分內之事，點解邱騰華唔反思吓係咪佢哋嘅工作做得唔夠呢？

大嘆通識難教

邱騰華尋日授勳之後急急腳趕去商界環保協會舉辦嘅「低碳校園2030─與局長對話」，佢本來準備咗三大環保議題，諗住同學生深入討論，點知開場見到學生反應麻麻，於是佢忽發奇想、大玩環保常識題，希望打開彼此隔閡，於是問學生：「知唔知香港每年人均碳排放量有幾多？」台下學生O晒嘴，邱騰華就拋出人均五噸、十噸同十五噸三個答案畀人揀，其實呢啲都係山埃貼士，正確答案係六噸至啱。

佢跟住又問學生，如果香港同美國、英國、日本、新加坡比較，邊度嘅人均碳排放量最低，學生一致估美國最高、英國中間、日本最低、新加坡低過香港，點知幾乎全錯收場。邱局長聞言大嘆：「又錯啦！通識真係好難教，要同老師校長講吓啦！」正確答案係美國每年人均碳排放超過二十噸，新加坡就有九噸、日本都有十二噸。

邱騰華話，香港每年人均碳排放量緊貼全球平均嘅六至七噸，拋離上述四大城市。不過，佢同學生嘅對答都顯示，本地學生嘅環保常識真係有必要加強，邱騰華都唔應該諉過通識教育就算數，試諗吓，啲學生都答唔出環保A、B、C，一般小市民咪更差？講嚟講去，香港人嘅環保意識同當地環境部門嘅工作密切相關，邱騰華咪以為卸膊就得o架！