政壇：中大陳英凝唔吼食衞副局

食物及衞生局前副局長梁卓偉升任特首辦主任後，盛傳中大公共衞生及基層醫療學院助理教授Emily陳英凝或會接任，但Emily直言唔會考慮加入政府喎。

Emily話，仔女只有六歲同四歲，想放多啲時間栽培佢哋。何況佢月前加入CCOUC災害與人道救援研究所擔任所長，不時帶隊參與救援，周身唔得閒。佢最難忘帶班醫生同義工探訪甘肅、四川等偏遠山區，向村民派發救援包，又幫村民影相留念。佢話唔少窮家小孩見到一張屬於自己嘅相片，開心到笑唔停，令佢覺得參與救援工作意義更大！