政壇：國情班學二鍋頭配饅頭
要喺學校入面搞國情教育，唔係咁容易，反而工商界嘅大人就好願意自動自覺咁去接受國情教育，仲成立咗一個中國國家行政學院工商專業同學會添。
原來過去三年，工商界一共有百幾人參加咗國情研習班，一年兩屆，一共搞咗六屆。喺尋晚嘅成立典禮上，出席嘅同學仔包括九巴金公主伍穎梅、國泰航空企業事務董事莊偉茵同佢老公黃楚權等。
喺典禮上，第四屆嘅同學仔、香港中國旅行社出境旅遊中心副總經理柯天德、李嘉誠基金會董事洪小蓮同中華出入口商會常務會董陳健文喜相逢，大家傾起喺北京上堂時嘅趣事，特別係喺晨早流流以二鍋頭配饅頭做早餐，令佢哋好難忘。其實呢啲咪係國情囉，咁獨特嘅國情，唔學又點知呢？
