政壇：棠哥金曲單挑許志安
不嬲都好「唱」得嘅工聯會會長鄭耀棠，下個月二十四號將會粉墨登場，參加建造業慈善演唱會嘅演出，同場仲有歌星許志安表演添！呢個演唱會目的係為建造業關懷基金籌款，除咗棠哥之外，專業會議立法會議員石禮謙同屋宇署署長區載佳當晚都會大唱特唱。據講，棠哥最耍家都係唱七、八十年代嘅懷舊金曲，首本名曲係《把根留住》同《莫斯科郊外的夜晚》，有冇新飲歌就唔知嘞。棠哥同許志安嚟個一新一舊對比，諗落都幾有趣。
咁石禮謙又唱成點呢？淨係睇身形已經知道佢中氣十足，至於係咪可以媲美世界級男高音嘅唱功，就真係到時至知嘞。
鄭耀棠（左二）將會同許志安（中）同場演出，唔知會擦出乜嘢火花呢？