政壇：搞搞政：匯賢智庫升呢入聯合國組織

匯賢智庫最近傳喜訊，主席葉劉淑儀真係飲得杯落。事關匯賢智庫學苑獲得聯合國轄下嘅聯合國教科文組（UNESCO）賞識，邀請佢哋成為香港區成員學校，認真可喜可賀！葉劉就話，好榮幸得到UNESCO嘅認同。

離開官場後嘅葉劉，先係形象大變身，跟住去一轉Stanford深造，返港之後喺政壇發展好順利，家吓連辦學都咁出色。UNESCO主力推動可持續教育，藉推廣多元同埋可持續發展教育，加強文化交流，依家UNESCO喺香港一共有十九間成員學校，大多數都係中學，而匯賢智庫學苑係唯一一間智庫學苑。

點解匯賢智庫學苑咁受青睞？原來佢哋係過去三年先後舉辦咗十幾個課程，身為校長嘅葉劉就搵咗好多猛料之人幫佢開班，蘭桂坊之父盛智文、前布政司鍾逸傑都有幫葉劉教過班，而學苑開嘅課程亦都好多元化，除咗一般針對中學生嘅通識課程，就連成人通識都有，整個學苑三年嚟總共教授過四百幾個學生，真係春風化雨有功。