政壇：唐唐CY冧鄉紳博攞分

兩位疑似特首參選人唐英年（唐唐）同梁振英（CY）近日四出拜票，尋日兩個人同獲邀出席新界鄉議局嘅村代表申訴大會。鄉議局連埋友好嘅特首選委票有逾一百張，兩個備選者自然喺大會上講盡好話冧鄉紳，唐唐更開聲贊成研究放寬丁屋嘅高度限制，間接聲援鄉紳反對政府取締村屋僭建博攞分。

CY亦不甘示弱話，新界將來唔會再係香港嘅偏遠地區，而係珠三角地帶嘅中心，仲話如果私人產權同公眾利益有衝突時，政府應該用合法、合情、合理嘅方法處理，外國有經驗係成立保育基金解決問題，意味將來因為保育地而令土地價值下降，業權人有機會取得賠償，呢番說話同樣冧爆一眾鄉紳。唔少鄉紳都話，兩個人各有千秋，暫時唔肯透露邊個係心儀特首人選。

鄉議局今年確係多事之秋，好似村屋僭建、私人土地變保育地等，總之樣樣都唔順利，主席劉皇發致開幕詞時話，新界現時民怨愈積愈深，民生問題千瘡百孔，鄉民已經到咗有冤無路訴嘅地步。

村代表大會上，有元朗原居民在場派發傳單，內容係鼓勵所有原居民唔好怕抗爭，不惜走上街都要保衞家園，有原居民仲話，煲呔曾呢個夕陽政府乜都搞唔好，佢哋已經冇晒信心，轉而向下屆政府反映好過，仲寸爆煲呔曾不如盡早落台，唔好阻住地球轉喎。