政壇：議員合照六四Tee搶鏡
尋日一班議員喺立法會新大樓地下大堂影番幅大合照，各議員都悉心打扮。梗係啦，明年立法會就換屆，有冇得留低都未知，影番幅相留念好緊要㗎。好似議員陳淑莊同謝偉俊就一個桃紅色、一個鮮藍色，加埋坐喺第一排着住鮮紅套裝嘅劉慧卿，組成一個鮮色鐵三角，非常搶眼。
諗住一齊組新工黨嘅李卓人、何秀蘭同梁耀忠，就一齊着「六四」二十二周年T恤影相，據講連特首辦主任梁卓偉都話佢件Tee夠搶眼。影集體相一般按高度排位，但如果黨友仔一齊企但又唔夠高，咁點算好呢？攝影師就好細心咁拎住啲紙皮，諗住畀議員墊高企，但有議員就耍手擰頭話唔要。
不過，細心睇吓幅大合照，就會發現唔齊人，社民連「長毛」梁國雄、人民力量黃毓民同陳偉業等人都冇影。
一眾立法會議員喺新大樓地下大堂影大合照，分幾行企唔使靠合成。