政壇：沈祖堯扮粉絲 抽喬布斯水

有「科技之神」稱號嘅Apple教主喬布斯（Steve Jobs）不幸去世，全球信徒紛紛致哀，不過亦有啲根本冇乜用過Apple產品嘅人乘機抽水，扮識嘢發表偉論。中文大學校長沈祖堯尋日就喺網誌撰文大談喬布斯嘅精神，但原來佢對上一次認真使用Apple產品，已經係超過二十年前嘅事，依家唯一擁有嘅iPad，都係由朋友送嘅，佢根本唔多識用。

沈祖堯喺網誌表示，喺喬布斯身上學到三樣嘢，首先係做人唔好隨波逐流，要創造自己嘅價值同「世界」，例如讀大學揀科同畢業後搵工，都唔好父母朋友話揀乜就乜，如果個個都係咁，呢個世界就唔會有iPod、iPhone、iPad同iDream；第二樣係要熱愛你所做嘅事，並且要終身投入，求知若飢，虛心若愚；第三係唔好以自己嘅現狀為苦，要保持樂觀，對準目標，並時刻與團隊密切合作，然後就大談喬布斯嘅身世同奮鬥史。

翻炒通識課引用資料

講歷史講得頭頭是道，大家實以為佢係喬布斯嘅忠實粉絲啦，但原來佢不但冇買過最基本嘅Apple產品iPhone同iPod，唯一有嘅iPad都係朋友送嘅，佢甚至唔識用iTunes同林林總總嘅應用程式。佢咁多年嚟唯一用真金白銀買過嘅Apple產品，就係八九年寫論文時用嘅第一代Apple Classic黑白屏幕電腦，部老爺機依家仲擺喺佢屋企。

至於沈祖堯今次引用種種有關喬布斯同Apple嘅知識，原來係嚟自佢喺大學講通識教育課「偉人與偉論」時引用嘅資料，即係炒冷飯資源再用。