政壇：林公公辣(慶)政府司機

自從歷來最低民望嘅「林公公」林瑞麟升任政務司司長（CS）後，好多人都睇佢唔順眼，最近政府司機職系工會聯席委員會等五個政府司機工會去函立法會，炮轟林公公早前以局長身份外聘私人司機，理論上應該跟隨調動到司長辦公室工作，但佢突然發覺需要用番前CS嘅貴賓車私人司機，加上前特首辦主任譚志源又帶埋舊有司機過政制及內地事務局，所以林公公將自己聘請嘅私人司機安排到特首辦工作。

五個工會質疑，林公公此舉嚴重違反政府嘅聘用條款，加上佢近年處事經常繞過現存有效公務員機制，利用權力達至個人嘅喜好，所以佢哋擔心林公公晉升司長後，繼續咁樣處事，唔單止破壞港府百年健全公務員制度，更甚會影響現時管治班子威信喎。

政府發言人回應話，林公公出任局長時嘅司機，獲特首辦主任按照政治委任制度聘任，強調各項安排都符合相關制度喎。

究竟事件係林公公嘅錯，定係別有內情，大家要自行判斷喇！