政壇：星之子寫App幫老師紓壓

研發力勁爆嘅「星之子」陳易希，早前同幾個朋友合夥創辦科技公司「Bull.b Tech」，主要開發iPhone、iPad系統軟件（App），短短五個月已經有啲成果嘞！

眼見香港教師嘅壓力大，佢最新研發個名為「教師憤怒了！」嘅App畀大家免費下載，玩家只需要喺模擬黑板上將「解壓良方」拖曳到書包，擦走「解壓劣方」，就可以將工作上嘅不快一掃而空。佢透露，依家正努力研發唔同類型嘅App，其中一個係關於籌備婚禮，佢形容會以得意同實用為主，最快年底會推出。

依家創業並唔容易，但佢好有信心咁話，自己喺第一代iPhone推出時已開始寫App，至今已累積咗一定經驗，而且佢寫嘅App會着重速度同互動性，以爭取用家嘅支持。佢預計公司未來可以年賺百萬元，同時希望可以幫助到非牟利團體宣傳，解決弱勢社群喺生活上嘅不便。