政壇：陳建業落區捱鬧更落力
區選係一場大仗，富貴黨今屆都派出唔少年輕黨員參選，今年三十歲嘅陳建業（阿業）嚟緊會喺深水埗龍坪及上白田選區參選，屋企做酒樓生意嘅佢入黨已有兩年幾，阿業大學時修讀工商管理，講到參選心得，佢坦言落區前完全冇諗過向街坊派嘢都會畀人鬧，令佢大開眼界。
阿業話落手落腳做地區工作時，先知自己乜都唔識，試過派贈品時因為重複派畀同一個街坊，其他人就覺得唔公平，對佢破口大罵，雖然派嘢畀人鬧，但阿業一啲都冇灰心，更加無嬲嗰個街坊，因為街坊之所以咁緊張，完全係因為生活環境唔好，歸根究柢又係政府施政唔掂囉。
呢件事仲激發起佢嘅鬥志，幫人會更加落力。除咗陳建業外，龍坪及上白田選區其餘兩位候選人分別係民協吳美及人民力量張本釗。
