政壇：李運強娶新抱猛人到賀
理文造紙主席李運強二仔李文恩（Norman）尋晚迎娶家電太子女郭靜怡（Lorinda），再做老爺嘅李運強開心到笑唔停，同太太送咗隻名貴手錶賀囝囝。Norman係李家最後一位「鑽石男」，其餘五兄弟姊妹早已成家立室，難怪李爸爸話：「感覺好圓滿！」
李家尋晚喺尖沙咀洲際酒店筵開近五十席，城中政商界名人齊來飲喜酒，三十二歲嘅Norman長駐蘇州，係理文化工揸fit人。新娘子Lorinda來頭不小，爸爸郭燦耀係光榮電業董事總經理，Norman自爆早於十幾歲已在家庭聚會中認識太太，兩年幾前拍拖。見到新郎哥弟弟文斌，問佢哋兩夫婦送乜嘢賀禮，佢哋笑騎騎話，梗係送龍鳳鈪最實際啦！
李文恩與郭靜怡（右四及右五）結婚，爸爸李運強（右三）同媽媽（右二）送上祝福。左一為前高官李麗娟。