政壇：溫州員工微博求老闆回國
近期溫州中小企老闆因為債務危機紛紛走佬，搞到市場不知幾咁恐慌，尋日喺網上就發現，有人喺微博發文，希望可以動之以情，想勸番個老闆返嚟。
以「溫州金泓擔保公司錢月珍董事長，你回來吧，我們不怪你」作為標題，呢位疑似員工嘅人喺微博發文，不斷咁支持個老闆返嚟，又話依家溫州政府已經出手救市，又話依家當地嚴厲打擊暴力追債，叫佢唔使怕搞唔掂。唔止呢招，員工仲動之以情，話錢老闆嘅員工都非常忠心，繼續苦苦支撐佢留低嘅爛攤子，唔少人仲湊錢幫間公司，仲試圖引導佢幻想，喺國外無人無物嘅慘況，實行諗到嘅都講晒出嚟，希望老闆回頭是岸！
有網友就當笑話咁睇，有啲更加認為文入面暗藏殺機，睇完貼文仲敢返嚟？