政壇：歡送騷起怨聲 消防一哥死撐

消防處「一哥」盧振雄退休在即，輪流去全港各消防總區告別探訪。本報連續兩日踢爆佢啲「o靚」懷疑為咗討好上頭，幫佢搞嘅歡送派對大陣仗之後，尋日佢去到上環消防局做第三場歡送騷都仲係唔識執番正，認真抵鬧。

座駕狂霸泊位兩粒鐘

成場夾埋當值同休班消防員約有五十人出席，雖然休班消防員唔少都變咗着便服polo恤，但都仲有少數人放假都逼住着「老西」返去敬禮。唔知係咪知有記者監察，擔擔抬抬搬櫈搬梯影大合照嗰陣，尋日先識得「做畀人睇」改由休班消防員做義工，冇理由浪費當值人手做私務，有起事嚟要出動就真係七手八腳。至於公式化嘅歡迎橫額，仍然係大大隻字寫住「消防處處長榮休親善探訪」，今次掛番喺消防局大樓嘅簷篷，而唔係拉架消防車嚟掛淪為布景板。

不過，最離譜都仲係消防「一哥」嘅座駕仍然喺直剷入去，霸咗一條消防車泊位，仲足足泊咗兩粒幾鐘。盧處長臨走嗰陣，當值消防員個個要排排企笑住拍手歡送，處長見有記者影相本來驅車即閃，點知諗諗下兜番轉頭，仲絞低車窗回應記者提問，佢話從冇硬性規定要出席消防員着西裝，但佢覺得着「老西」係尊重，佢作為處長着西裝出席都係尊重同事、尊重個場合。

佢又話退休之前探訪都係想鼓勵同感謝吓啲同事，向同袍寄語以後邊啲要做，邊啲可以做好啲，佢希望個個都係自願出席嘅！

嘩！若果大家都覺得冇問題嘅話，就唔會有人睇唔過眼，亦唔會有人覺得不吐不快喇，盧處長仲喺度死撐都冇用o架！