政壇：熱爆插畫家拒被收買

政治插畫家Cuson盧熾剛以抵死啜核風格紅爆網絡，佢筆下畫過數百政治人物，要數最容易畫，佢首推煲呔曾，「好搞笑，你將啲最醜樣嘅元素擺埋一齊，就變咗煲呔曾」。佢話煲呔曾特徵係高額、大鼻、哨牙、冇框眼鏡，同左右各一大舊「U形面豬登」，所以要畫佢好簡單。不過，佢批評，就算畫到成班政府高官幾樣衰都好，佢哋都唔會反省，「有時市民都好期待，究竟我點畫衰班高官！」畫政治漫畫唯一好處，係幫一眾小市民消吓氣、出番啖氣。

好似早排立法會議員「鼠王芬」梁美芬搵人打畀佢問價，希望佢幫自己畫幾幅靚畫，點知Cuson話自己雖然係生意人，但都要過到自己嗰關，拒絕被金錢收買，「你叫我畫到梁美芬好靚，我就唔得囉」。最後佢唔好意思推，惟有將價錢再叫高兩成，之後鼠王芬可能嫌貴，再冇下文。

正如財爺鬍鬚曾喺預算案用漫畫吸引年輕人，第一個就諗到Cuson，仲曾託中間人打聽佢嘅意向，但中間人隨即話Cuson一定唔會幫政府，「其實我都想試吓幫政府畫，最多喺入面加啲政治密碼」。