機械臂失諸交臂 醫管局剝削病人

今日先講一個故事。

從前有個又蠢又懶嘅學生叫朱錦春，年年考試名落孫山，科科捧零雞蛋。有一日，朱錦春喺田間救咗隻跛腳草蜢，原來小昆蟲真身係一位落難神仙，於是就向小朱顯靈報恩嘞，話可以幫佢換過個腦，保證佢以後讀書一粒鐘，勝過別人百年功咁話。你估結果點呢？結果朱錦春照樣年年考第尾，事關佢覺得就算讀一粒鐘書，佢都頂唔順，所以拒絕仙人嘅一番美意，仲請仙人快快過主添。

各位，如果朱錦春係你個仔，你係咪好想搉爆佢個頭？定係會覺得呢個諷刺世人不思進取嘅故事太誇張，質疑世上邊有人蠢成咁、懶成咁，邊會有咁荒謬嘅事？咪住，等等，醫管局就係發生咗咁荒謬嘅情節，就係有咁蠢咁懶高層！

件事係咁嘅。微創手術有種先進設備叫「達文西機械臂」，比傳統技術更加精準，病人創傷小又復原快。但好可惜，醫管局咁耐只係得兩間公立醫院配備呢種新科技，其他醫院嘅病人望穿秋水都係得個望字。

好嘞，終於等到神仙打救。原來一早有善長仁翁表示，願意捐贈逾千萬元畀伊利沙伯醫院購置機械臂，屯門醫院亦獲贈器材，呢個簡直就係微創病人嘅福音啦。點知醫管局竟然請人食檸檬，主要原因係唔想承擔每年近百萬元嘅維修保養費喎。就係咁，醫管局坐失引入新儀器嘅良機，失諸交「臂」。

各位，事情係咪好荒謬呢？機械臂可以令廣大微創病人受惠，千萬元器材已經送到大門口，但係醫管局為咗區區保養費而關門拒受，咁仲唔係「朱錦春」？正如醫學界立法會議員話齋，即使醫管局唔想承擔保養費，大可考慮向病人收回部分開支嘅啫，無理由諗都唔諗，研究都唔研究，就剝奪病人選擇新技術嘅權利㗎，呢種心態唔係不思進取，又係乜嘢呢？

最離譜嘅仲係，醫管局縮骨成性，為咗慳保養費，寧願犧牲病人權益，但係另一方面，醫管局出糧畀自己班高層就不知幾咁大手筆，動輒年薪幾百萬，求其搵個減幾成人工，都夠畀機械臂嘅保養費咯。

話時話，醫管局高層除咗似「朱錦春」又懶又蠢之外，佢哋仲有一個問題，就係缺乏醫者父母心嘅熱腸。欠缺機械臂，病人施手術隨時微創變重創，佢哋話之你，最緊要計靚營運收支盤數交差。

計太一叮話齋，又蠢又懶又不仁嘅醫療庸官，絕對唔值咁高人工，起碼減薪一半，將啲錢用嚟購置機械臂就差唔多，大家話係咪咁至啱數先，叮！