政情：特首辦地址fb甩漏多
特首辦喺幾日前已陸續將文件、辦公室傢俬運去添馬艦新政府總部，之後仲出份白紙黑字新聞稿，大事宣揚搬竇一事，尋日終於正式進駐新總部，但甩漏多多。
例如直到尋晚，我哋喺網上政府電話簿發現，特首辦地址依然係寫住五個字：「香港禮賓府」；特首辦有個facebook專頁叫做「上亞厘畢道」，依家特首辦都走咗，專頁明顯名不副實，既然煲呔曾經常將民意當耳邊風，不如佢今次將專頁名稱改成網民提議嘅「上阿爺嗰道」算啦，一來呢個名永遠都冇更改嘅需要，二來亦配合煲呔曾冇乜自主能力。
老闆唔喺度，譚志源就係特首辦最大粒嗰個，成為首位企喺新特首辦門口接受訪問嘅官，但只係講官話，大讚新政府總部樣樣都好好，但被問及副總理李克強係咪會為添馬艦揭幕時，佢就一味避談，叫大家耐心啲等。
譚志源大耍官腔，讚新政府總部樣樣好。