區議員玩失蹤　旅行團無王管

小小香港，怪事多多，連區議員亦捲入「旅行團醜聞」，問你服未。曾經因為虧空公款被判監嘅深水埗區議員官世亮，日前舉辦澳門純玩兩天團，會員價盛惠每人一千三百八十八元，吸引二百名街坊報名。點知出發前一晚，官世亮忽然宣布取消行程，仲立下字據保證退款，但尋日街坊上門追討時卻發現佢失咗蹤，連電話都唔聽，搞到街坊要報警求助。

不如聽吓接辦嘅旅行社點講吖。佢哋話，曾經喺五月接獲官世亮要求協辦旅行團，但到六月十日都未收到訂金，所以喺六月十四日通知官世亮取消該旅行團。換言之，旅行團上月中已取消，但官世亮就收咗總數近二十八萬元團費，一直冇退還，難怪報咗名嘅街坊懷疑自己受騙喇。

今次事件尚待調查，街坊係咪受騙暫時未知，但可以肯定嘅係，近年涉及區議員嘅醜聞愈嚟愈多，區議會嘅形象已經所餘無幾。最離譜嘅係，部分區議員竟然知法犯法，賄選有之、呃津貼有之、虛報競選開支有之，官世亮本身亦曾因為虧空公款被判入獄，只因刑期唔夠三個月，所以可以繼續擔任區議員。

今次事件除咗令人質疑區議員嘅個人誠信，亦提醒當局，應該適時檢討區議會制度喇。正如有人話齋，雖然官世亮嘅刑期唔夠三個月，但犯嘅係虧空公款嚴重罪行，仲適唔適合繼續擔任區議員呢？

仲有呀，對於旅行團嘅規管，當局都應該好好檢討喇。近年類似嘅屋邨旅行團愈來愈普遍，主辦者除咗議員，仲有地區組織、志願團體、政黨等等，行程遠到去北京了解國情，近到去郊野公園燒烤聯誼，林林總總、各適其適。最弊呢啲旅行團究竟係牟利定係非牟利、合唔合法，市民根本一無所知。

旅遊業者指出，現行法例只規定民間團體主辦嘅境外旅行團要由持牌旅行社協辦，但本地團就完全唔受規管，可以自行舉辦，亦毋須向旅議會打印花，成為監管上嘅大漏洞，萬一主辦者倒閉或存心欺詐，參加者毫無保障。

一句講晒，議員搞活動，為街坊提供娛樂，本來係無可厚非嘅，但如果港府闊佬懶理，關人個關，任得呢啲旅行團無王管，咁就隨時好事變壞事喇，叮！