政情：IQ博士免費午餐誘記者
中聯辦主任彭清華尋日邀請一班建制派議員上深圳紫荊山莊會面同午宴，大批記者蜂擁到現場守候，正當大家喺酷熱天氣下乾曬守候時，有份出席嘅中總「IQ博士」黃宜弘就主動邀請在場記者去佢嘅深圳別墅食午飯，惹嚟遐想連篇。
事緣IQ博士喺開會期間致電司機，再叫司機將電話交畀在場其中一名記者，講明只要大家願意嘅話，佢個司機可以接送大家去佢深圳別墅食午飯。不過，大家都唔想離開工作崗位，惟有婉拒佢嘅好意，食咗檸檬嘅IQ博士即刻諗咗個折衷嘅辦法，就係叫佢個司機出去買外賣飯盒畀大家食。
大家估點解IQ博士開開吓會忽然想請記者食飯呢？係想施調虎離山之計引開記者吖，定係想記者知道佢喺深圳有間別墅呢？睇怕只有主人家至知嘞！
黃宜弘