政情：大橋環評風波司局長摑煲呔曾

圍繞港珠澳大橋環評官司嘅爭論連日鬧個不停，煲呔曾日前喺立法會狠批有政客藉環保阻撓基建發展後，兩個律師會即刻聯手反擊，暗批佢有違法治同司法獨立，煲呔曾嘅下屬、專責法律政策嘅律政司司長黃仁龍同專責環保政策嘅環境局局長邱騰華尋日回應事件，雖然想幫佢補鑊解畫，點知卻係愈描愈黑，好似狠摑煲呔曾兩巴。

黃仁龍尋日話，環評官司已啟動上訴程序，所以大家都唔應該進一步評論，咁即係煲呔曾都唔應該講喇？佢又話政府不時都打輸官司，即使情況嚴重，都必須尊重法院判決，而且一日未上訴成功，都要根據判決做事，最後仲加多句「這是非常重要的」，同樣好似係鬧緊政府，與兩個律師會同一鼻孔出氣。邱騰華被問及有關問題時，亦強調香港係個法治社會，邊一個不滿行政措施，都可以向法院提出訴訟，當然政府亦有權上訴，相信法院會一視同仁。