政情：搞搞政：李慧琼變髮玩新Look

今明兩年都係選舉年，政圈中人各有大計，建仔嘅李慧琼（Starry）由入主議會嘅新星，到近排出任該黨副主席，可謂拾級而上。身為會計師嘅Starry近排又有新構思，原來佢嫌自己打扮太正經，近期想整色整水，早前仲試過將頭髮染成紫色添，但因為入鏡太搶眼，又染番黑色，遲啲佢又打算染色，但就冇透露點整。

Starry尋日接受電台訪問，除咗講到打算變型look外，仲講到從政後嘅生活。佢話，做咗議員後陪囡囡嘅時間少咗好多，原本計劃再追多個小朋友，但家吓都無能為力囉，因為依家已經好難搵到時間照顧小朋友，如果有得返轉頭嘅話，佢希望可以生對twins，咁就可以一胎兩個搞掂晒。

其實，Starry嘅考慮可能都同佢嘅政壇路有關，事關佢嚟緊好大機會循超級區議會出選，玩法由過去單一選區擴大到全港，相信佢呢兩年為備戰選舉將會忙上加忙，難怪佢話生多個都無能為力啦。