陰滋病毒極恐怖 官僚輕敵更可怕

內地官僚真係有病！「陰滋病」為禍神州大地，受害病人多達數千之眾，但衞生當局依然死撐，否認呢種恐怖病毒嘅存在，睇嚟內地官僚隱瞞疫情嘅痼疾的確好嚴重。叮！

陰滋病全名「陰性愛滋病」，由東方報業集團率先獨家披露同冠名，其後疫情真相愈揭愈多，愈揭愈恐怖。不如睇吓專家對呢隻世紀病毒嘅最新研究結果先啦。曾經解構沙士病毒嘅中國工程院院士鍾南山證實，八成陰滋病患者感染一種或多種病原體，當中超過三分之二係感染具傳染性嘅EB病毒，否定病症單純由心理因素引起。

嗱，鍾南山嘅研究結果簡直係對內地衞生當局嘅當頭棒喝。衞生部早前睜眼說瞎話，聲稱陰滋病人無病，甚至暗示病人精神有問題，更加否認EB病毒有傳染性同埋係致病原因。但係，謊言始終係謊言，喺專家面前，官僚醜態就好似細菌喺顯微鏡之下，無所遁形。

不過咁，衞生部對陰滋病禍患漫不經心，太一叮一啲都唔覺得奇怪，事關內地每次爆出重大公共衞生危機，國產官僚最初例牌否認㗎啦。當年沙士爆發，時任衞生部部長張文康夠斬釘截鐵叫大家唔使擔心啦，仲叫全世界旅客放心到中國旅遊添，結果點呀？咪害到全世界雞毛鴨血囉，香港仲差啲萬劫不復吖。如果沙士唔係衝出中國為禍全球，人人（目及）到實，張文康可能夠膽話沙士無死過人添呀！

面對世紀病毒危機，缺乏危機意識就係最大嘅危機，衞生部呢種態度，等如助長陰滋病蔓延，令呢隻恐怖病毒恰如其名，陰滋陰滋唔經唔覺就擴散開去，一旦搞到好似沙士咁一發不可收拾，到時再多一百個張文康被祭旗革職都無補於事。

學內地官老爺話齋，本來井水不犯河水，問題係怪病當前，港人絕對不能選擇沉默，一嚟人命關天，不能坐視內地同胞受害不理，二嚟香港同內地僅一河之隔，陰滋病肆虐，香港遲早出事，沙士一役就係例子。喂，陰滋病傳播力強，一人得病，全家感染，連口水都可以成為傳播源，恐怖成咁，衞生部仲當冇事發生，離唔離譜啲吖！

一言以蔽之，拜託內地衞生官員唔好再老神在在嘞，盡快徹查病源，控制疫情，保障民眾健康。官老爺就算唔識乜嘢為人民服務，就當為自己前途着想囉。仲有吖，你哋唔鍾意「陰滋病」呢個名，咪起過第二個名囉，點都唔能夠視若無睹o架，叮！