政情：搞搞政：囡囡母親節送禮葉劉找數

啱啱過去嘅母親節，新民黨主席葉劉淑儀都同唔少媽咪一樣，收到意外驚喜，事關佢含辛茹苦湊大嘅囡囡Cynthia雖身在美國，仍越洋訂咗一籃包上朱古力嘅士多啤梨畀佢，仲奉上一個「I Love You」氣球，葉劉收禮物梗係冧到爆啦！不過，仲係學生嘅Cynthia雖然孝心爆棚，但買禮物嘅資金始終嚟自葉劉張卡，所以葉劉開心完後，都要為心甜嘅代價埋單，睇佢咁冧，實唔介意嘅！

葉劉收到呢份禮物嘅時候不知幾開心，擺個氣球喺屋企留念。佢話後來先知道身在美國嘅囡囡專登打咗幾次長途電話返香港落訂，訂咗之後仲不斷跟進媽咪收唔收到。雖然份禮物最終都係葉劉自費，不過Cynthia咁有心，葉劉拎住份禮物影咗好多相，仲擺喺facebook晒幸福添。

囡囡揀士多啤梨，原來因為係葉劉最鍾意食嘅生果之一，貪佢有豐富維他命C兼且有抗癌作用，每朝早餐都會混合脫脂奶同穀物片一齊食。