政情：《南早》又出錯 誤報「奧巴馬」已死

正所謂錯開有條路，本港英文報章《南華早報》繼去年誤將國家主席「胡錦濤」個中文名寫錯成維權人士「胡佳」後，尋日又再出錯，但今次錯得仲離譜，竟然將Osama變成Obama，即係將美國「頭號通緝犯」拉登嗰英文名寫成美國總統奧巴馬，仲話奧巴馬死咗添，認真大吉利是，更淪為國際大笑話。

Osama變Obama

揭開尋日《南早》A1頭版，標題係「Osama bin Laden dead」（拉登已死），本來好哋哋，點知揭到A2版右邊一段配稿，標題真係嚇親人，「Obama bin Laden is dead」（奧巴馬已死）。其實拉登英文名係Osama bin Laden，奧巴馬英文名係Barack Hussein Obama，好難搞錯啫！

無獨有偶，《南早》每次出錯，都係搞錯國家領導人個名，上次將「胡錦濤」寫錯「胡佳」，最後要道歉兼收番啲報紙，《南早》就解釋因為其報館嘅外國員工唔識睇中文，今次又唔知會點解釋呢？據知，《南早》今日會喺報紙登番段更正啟事補鑊！