政情：百元教投資人幣任總貶身價

金融管理局前總裁任志剛退任後去咗中大執教鞭，又係中國金融學會執行副會長，不過咁耐以嚟，佢每次開腔回應金融事務，都係講人民幣匯率、香港喺人民幣業務嘅角色等。嚟緊二十四號，任總喺中大又搞咗個「中國的貨幣及匯率政策」講座，身價不菲嘅任總今次索價每位一百蚊，以金融論壇嚟講，呢個價格真可謂街坊價！

呢個講座由中大全球經濟及金融研究所舉辦，地點亦喺中大校園，上個月開始已可以喺網上預訂講座嘅飛。復活節假期之後，我哋都上網試過，個講座似乎仲有位，仍接受預訂。

本港每年有大大小小金融投資講座，視乎演講者嘅叫座力同身價，有啲講座索價幾百蚊，有啲就貴到幾千蚊甚至過萬蚊都有，任總今次開講只係索價一百蚊，可以話係好抵嘅街坊價。不過，今次舉辦講座嘅係大學，地點亦喺校園，同純商業嘅投資講座有所不同都係合理嘅。

扣除行政費 隨時冇錢袋

近期人民幣升值速度加快，本港又出現首隻人民幣計價嘅股票掛牌，商機處處下，投資者對人民幣投資策略嘅關注更加高，退任之後就一直注視人民幣發展嘅任總，每次公開發言或訪問嘅焦點都圍繞人民幣發展，唔係自由兌換、匯率政策，就係香港發展人民幣業務等，話佢食開人民幣條水都冇錯，今次舉辦收費講座亦順理成章。

中大喺網上披露，收取一百蚊入場費係要抵銷部分行政費用，扣除行政費用後，任總仲有冇得袋演講費都唔知，不過，對金融事務發緊燒嘅任總好明顯一啲都唔介意。