政情：駐京辦成入境處升職位

自做過特區政府駐京辦事處嘅陳國基獲委任為入境處處長之後，駐京職位似乎成為咗入境處部門內晉升嘅必經之途，啱啱升任助理處長（簽證及政策）只有一個月嘅曾國衛（圖），喺○七年至一○年間同樣借調過駐京辦，尋日問起點睇自己呢條「直升機」之路時，佢聽完問題後報以笑容話千祈唔好咁講，但喺駐京期間確實了解到唔少國情。

年僅四十七歲就晉升管理層嘅曾國衛話，駐京好多時要同內地官員接觸，但喺內地架構複雜，職位多，要搞好件事，一定要搵啱對口單位，而內地官員好講求信任，當取得對方信任之後，好多事情都好傾好多，呢啲經驗對佢嚟講非常寶貴。

喺駐京期間遇上汶川地震同豬流感，佢憶述當時需要飛去唔同地方協助喺當地嘅港人，內蒙、西藏同雲南等地都去過，又話：「不過記憶最深嘅反而係患有精神病而喺內地嘅港人，佢哋好需要我哋嘅協助。」