盡母最後責任為愛女求個明白

【本報訊】「以前有朋友擔心阿女會負累我，但我從來無咁諗過，我做母親，好希望有生之年湊大佢，完全無諗過放棄！」雖然紫雪是智障人士，但在練太眼中，她猶如小天使般可愛：「佢真係好得意，佢認得我㗎，雖然佢唔識講，但佢知道我係佢媽媽，知道我好愛錫佢，聽到我把聲就好有反應咁望住我，表現得好開心、好興奮。」

「醫院好似整死佢咁」

回望愛女的短暫人生，她仍深感悔疚：「嗰時經濟唔好，老公失業，我大住個肚去做警衞，每月賺四、五千蚊養一家三口，屋企連電話都無裝，為打工我無去做產前檢查，點知有日喺屋企突然穿咗羊水，遲咗去醫院，要喺屋企生，搞成阿女咁。」

「初頭諗住佢都係救唔番，點知救得番，真係好開心，點都係一種緣分。」照顧小朋友要付出很大心機，照顧紫雪更要加倍心血：「佢啲筋骨都好軟，扶佢、抱佢、餵佢都要好小心。」練太待先生找到工作後，便辭工專心養育紫雪，沒料到紫雪○九年就離她而去。

「醫院真係好離譜，好似整死佢咁，我做阿媽睇住阿女走，都幫唔到佢，個心好難過。」紫雪離世後的這段日子，她仍不時以淚洗面，四出奔走投訴，希望盡母親最後責任，為愛女求個明白。