政情：追究傳奇混帳 議員圍剿曾德成

審計署踢爆東亞運爛帳後，呢個「創造傳奇一刻」嘅盛事即現形為「創造傳奇混帳」嘅蘇州屎，立法會政府帳目委員會決定舉行聆訊徹查，當日有份捐款舉辦呢個運動會嘅議員更加頂住道氣，繼林大輝開腔表不滿後，經濟動力嘅梁劉柔芬都坦承有捐款，事到如今亦惟有一句「冇乜所謂」。面對立法會徹查，民政事務局局長曾德成尋日卻厚面皮咁死撐，話東亞運係一個成功嘅賽事，係成功嘅亂使錢盛事啩？

用私人名義捐咗六百萬元嘅林大輝日前發炮後，尋日又繼續狙擊，佢話好多捐錢畀東亞運嘅人都係希望搞好個賽事，但係私人捐錢同政府撥款應該分開處理，因為私人捐款唔係捐畀一間公司，而東亞運公司擅自喺其他地方用錢更加唔妥，佢所指咪就係東亞運公司擅自將九百八十萬元捐予兩個運動員基金及就業教育計劃囉。

死撐搞得成功 拒即時回水

捐錢嘅唔係一肚氣，就係暗啞抵吞咗啖氣，公文袋嘅陳淑莊就話，佢都好關注東亞運嘅帳目，事關日前審計署嘅報告顯示東亞運「成盤數有好多甩漏」，佢仲舉例話，唔少項目嘅支出同收入不相符，如門票收入在不同報表上的金額不盡相同，甚至電視轉播權收益交代不清等，都需要一一跟進。

議員一片質疑，德成局長卻話之你，尋日話歡迎立法會舉行公開聆訊畀公眾了解詳情，佢仲死撐東亞運搞得好成功。可惜呀，議員要求佢哋將捐予舉辦東亞運嘅款項回水噃，德成局長一聽，即刻好賴皮咁話：「我哋需要尊重帳委會嘅程序，所以會喺帳委會會議上交代。」拖到立法會展開聆訊，佢咪又要畀人剝層皮。