短打長擊：讓自己成為廢噏家

有天分的人能成為科學家，沒有天分的人則用婚姻讓自己成為哲學家。鬍鬚曾不諳會計而敢於理財，自然沒有財爺的天分，故此便用網誌讓自己成為廢噏家。

為了讓「史上最廢」的預算案通過，鬚鬍曾頻頻在網上為自己臉上貼金。大風吹，黃葉落，吹完教育如何「給力」，可惜擺在眼前就是書商硬起來，教育局連要求書商分拆教材以降低成本都做唔到，成隻病貓又點充老虎？唔怪得之政府話自己冇牙力。

好喇！又吹吓醫療，一系列服務，好似講緊都係以千計嘅手術，仲話明年公共醫療服務又加，唔通個個去到瑪麗醫院，即刻可以得到司長或局長級嘅服務，第一時間通波仔？實情係點，稍有「常識」嘅人都知，先排流感高峰，到公院睇醫生，閒閒地要等六、七個鐘，你話要割白內障，睇怕眼盲都未輪到你！

鬍鬚曾，咪再自欺欺人啦！你引用邱吉爾名言：「給我們工具，我們便可以完成任務。」可是，庫房水浸，給你錢你都唔知點派，見你咁窩囊，又點會信「有了財政資源這必需的工具」，在你的「審慎理財」下，基層市民的幸福就會飛？患有自閉症兒童的笑靨會得以延續？

政府施政寸步難行，無非錯用「人才」，應了「帕金森定律」：一個不稱職的官員，其中一條出路就是找兩個平庸的助手分擔工作，自己則高高在上發號施令，平庸的助手不會威脅其威權；兩個助手既然無能，也就上行下效，為自己添多兩名無能的助手。一個廢柴領導層於焉誕生。