政情：白富鴻生日一統江山？
人稱「白老大」嘅菁英會主席白富鴻日前牛一，自掏腰包擺咗三圍請班手足飲酒作樂。席間佢收到最特別嘅禮物，係名為「筆筒江山」嘅精緻筆筒，眾人即興玩食字，起哄要白老大一統江山，搞到壽星公淨係識笑唔識答。成班後生仔盡情歡聚，情緒High爆。
當日到賀嘅菁英會成員有幾十人，甫獲委任做青年事務委員會成員嘅卡片皇老細鄭重科、經濟動力立法會議員林健鋒囝囝林凱章都喺度。林凱章奉行低調，影相時經常唔覺意烏低身或者行開咗，同佢爸爸嘅開朗搞笑風格迥然不同。
啱啱卸任東華三院主席嘅Billy梁定宇同太太張雅麗拍拖到場，佢哋都係國情研習班嘅同學仔，Billy同百仁基金主席施榮忻仲係第一期嘅大師兄添。菁英會係由參加國情研習班嘅同學仔組成，所以大家分期輪流玩敬酒，幾杯落肚後更顯真性情。
