政情：鄧鉅明嘆靚舖愈搶愈貴
近排租金愈升愈高，搞到一邊投資舖位一邊做鐘錶生意嘅太子珠寶老細Jimmy鄧鉅明都有啲恐懼症。
Jimmy話近排市場最混亂嘅係銅鑼灣區，有個靚舖被跨國鐘錶品牌租下，租金狂升三倍，完全脫離現實。租客嘅目的係作為旗艦店，以便長遠建立喺內地客心目中嘅品牌形象，所以不計成本。跨國公司財力雄厚，唔需要計較單一店舖自負盈虧，所以出手闊綽，佢擔心本地鐘錶行業冇本事同佢哋搶靚舖，未來競爭將愈嚟愈大。
睇住本港租金好似火箭咁有升冇跌，佢幾年前都開始買舖，有啲自用、有啲出租，但長遠都係留番畀太子珠寶用。由於佢哋嘅客仔有九成係內地客，所以佢除咗繼續喺遊客聚集嘅銅鑼灣、尖沙咀一帶搵靚舖之外，亦正密謀進軍內地開舖，預計上海、廣州第一間舖將喺下半年開業，到時佢就唔使同人搶租搶到牙痛咁聲啦！
