政情：徐子淇爸爸冇溫書破財

香港資源執行董事徐傳順靜待乖女「千億新抱」徐子淇再做媽咪期間，喺尋日兒童節破咗個小財。

香港資源嘅通告話收到徐傳順通知，尋日東區裁判法院因徐老爺未有及時披露出售香港資源股份，被判罰款42,000元，又要向證監會支付調查費28,625元。徐老爺解釋，冇披露係由於對上市規則第348（1）（a）條嘅誤解。

其實合共呢70,625蚊，對徐老爺嚟講只係小數目，亦相信佢應該真係唔熟上市規則，或者忙於照顧乖女而貴人事忙，唔記得「溫書」。不過，徐老爺老友兼香港資源主席黃英豪出身於大律師世家，請咗徐老爺做執董，都應該同佢補習吓上市條例。