政情：簡文樂任匈牙利名譽領事
提起匈牙利，香港人都唔會陌生，唔少人更領略過呢個旅遊熱點嘅文化同風情。尋日匈國駐港領事館舉行開幕禮，本港上市公司冠軍科技嘅老細簡文樂原來獲匈牙利政府委任為匈牙利駐港澳特別行政區名譽領事。
簡文樂話雙方早喺十年前結緣，佢一去到呢個國家就「一見鍾情」，仲對佢哋嘅歷史、文化、建築驚嘆不已。好多港人、尤其係鍾意浪漫嘅情侶，都會揀匈國旅遊，貪佢有文化內蘊外，仲有濃濃嘅歐陸風情，鍾意浸溫泉嘅人更唔會錯過添，皆因匈國有「溫泉之都」嘅美譽
唔講唔知，簡文樂早年曾經出任匈牙利—香港創新商務促進會召集人，而匈國自○四年加入歐盟後，現時喺東歐國家中，匈國更已成為香港最大嘅出口市場。
