政情：陳維安耍官腔避提問
教育界呢排有新紛爭，事關教育局副局長陳維安日前單方面宣稱，已就課本與教材分拆問題，同兩大出版商達成四點共識。呢句話一出即引嚟書商反擊，澄清未見共識，有書商更踢爆當局喺雙方會面嘅會議記錄「做手腳」，扣起業界意見，直指手法大石砸死蟹。
陳維安尋日出席一項公開活動時被記者追問件事，大家仲集體守候喺佢架車旁邊等佢離開，避免官員快閃。不過，陳維安對於係咪「講大話」、有冇修訂會議記錄等一味耍官腔，只係重申會如期喺今年九月落實分拆教材，希望減低課本價格云云。
咁行貨梗畀人嘈啦，大家再努力時，陳維安卻面燶燶咁話：「我哋對於呢幾日書商講嘅嘢已經作出回應，我哋冇補充。」然後轉身快閃上車走人。
