政情：搞搞政：楊哲安廢噏網民圍剿

眾多問責官員中，教育局政治助理Jeremy楊哲安較為活躍於facebook，早前仲因為留言講錯嘢，被網民瘋狂圍剿。但佢並冇經一事長一智，反而重蹈覆轍，結果當然係冇好下場啦！

喺立法會否決臨時撥款議案鬧得熱烘烘之際，Jeremy竟然喺facebook留言話：「政治目的重要，還是市民利益重要？」擔心否決撥款會影響近百億元教育開支。說話背後抽水味濃，貼出短短九個鐘已被逾八十名網民狠批。

有網民質疑政府交唔到份令人滿意嘅預算案，議員代市民講句「唔收貨」絕對合理，政府唔應該將個責任推卸畀人；亦有人話議會嘅作用係監察政府施政，如今議案被否決，政府好應該檢討，而非埋怨，總之網民聯手狠狠狂插Jeremy，撐佢嘅人寥寥可數。好明顯佢同政府一樣錯估形勢喎！

喺大批網民喪插下，Jeremy仲死不認錯，反駁網民指摘政府冇提醒建制派投票嘅言論，話任何公司都唔會每日打電話叫員工返工喎！莫非佢想寸建制派辦事不力？