張學明鄉局副主席不穩
隨住林偉強被「倒強派」煎皮拆骨，動搖佢新界鄉議局副主席之位後，近日亦有消息話另一副主席張學明個位都有暗湧，導火線同近年村屋僭建理順政策有關。
鄉議局多年前已就村屋嘅僭建問題同發展局磋商，畀經過專業評定冇問題嘅僭建物繼續存在，但據聞雙方談判膠着。不過，談判一日未完，地政總署繼續將村屋違例僭建個案轉介屋宇署執法，據講沙田區檢控個案有逾百宗，沙田鄉委會因而對談判進度緩慢感到唔耐煩，主席莫錦貴更去信鄉議局要求正視。
就係咁，有鄉紳就建議莫錦貴積極考慮挑戰張學明。我哋仲打聽到，部分沙田同元朗嘅鄉紳都話支持莫錦貴出選，所以場仗未必冇得打。究竟係咪真係會鍊過？六月鄉議局改選，應該好快就會知。
