政情：鬍鬚曾求饒表錯七日情

市民趁住尋日驚蟄上街打小人，因發表「史上最廢」預算案而遭全城喊打嘅財爺鬍鬚曾，尋日喺電台節目《給香港的信》撰文，總結教訓，曲線求饒。但文章第一句露底，佢以英國政壇名句「政治一個星期都嫌長」概括今次事件，對波譎雲詭嘅香江政治，好似已經豁然頓悟咁款。如果鬍鬚曾咁諗，佢就真係表錯七日情喇！

睇佢尋日喺市民上街前就急不及待強烈暗示，新移民唔會直接得到六千蚊，而係要透過關愛基金至得到關愛，市民特別係新移民火上加油，想唔上街都好難嘞。政治問題政治解決，但係佢遲遲疑疑，好似好有原則好有理據，其實佢嘅原則一推就冧，一切都站不住腳。

其實，喺預算案發表前，財爺用兩、三個月諮詢意見，預算案發表後，幾時通過撥款條例草案都有先例可循，今次佢平白浪費咗諮詢意見嗰幾個月，畀人狂轟之後就用七日嚟胡亂轉軚，預算案要推倒重來，政府有一個咁不濟嘅財爺，市民捱七日都嫌長，仲要等多一年零四個月，呢一屆政府至收工，更加不耐煩。鬍鬚曾自信全失，未來一年多更加唔會好過，唔知佢有冇打算順應民意提早收工呢？